მასალები, რომლებსაც დროის არ ეშინიათ
" ინტერიერის დიაზაინში ბუნებრივ მასალებს განსკუთრებული როლი აქვთ. თანამედროვე დიზაინის ერთ-ერთი ყველაზე მნიშვნელოვანი მიმართულება სწორედ ბუნებასთან და ბუნებრივ გარემოსთან ინტერიერის მეტ დაახლოებას გულისხმობს."
1. მიიჩნევთ თუ არა, რომ ინტერიერში ბუნებრივი მასალების როლი შეუცვლელია და არის თუ არა ამ მასალების გამოყენება პირდაპირ კავშირში მის ვიზუალურ მახასიათებლებთან?
ინტერიერის დიაზაინში ბუნებრივ მასალებს განსკუთრებული როლი აქვთ. თანამედროვე დიზაინის ერთ-ერთი ყველაზე მნიშვნელოვანი მიმართულება სწორედ ბუნებასთან და ბუნებრივ გარემოსთან ინტერიერის მეტ დაახლოებას გულისხმობს. ამ მხრივ ტრენდულია ბუნებრივი მასალების გამოყენება, განსაკუთრებით ხის ზედაპირების, ბუნებრივი ქვების, აქცენტების შექმნა მცენარეების საშუალებით. ჩემს მიერ განხორციელებულ ინტერიერის დიზაინ პროექტებში, ბუნებრივ მასალებს მათი რამოდენიმე თვისების გამო ვიყენებ. პირველ რიგში ასეთი მასალების საშუალებით ინტერიერი მდიდრულ, ელეგანტურ იერს და განსაკუთრებულ სტილს იძენს. ინტერიერს გამორჩეულად დახვეწილს და ელეგანტურს ხდის მარმარილოს გამოყენება კედლების, ავეჯის ზედაპირების ან იატაკის სახით, რაც თანამედროვე ინტერიერის ერთ-ერთი სახასიათო ტრენდია. ბუნებრივ მასალებთან მუშაობა ჩემთვის საინტერესოა, რადგან მათ საფუძველზე ნებისმიერი დიზაინის სტილის შექმნაა შესაძლებელი. ბუნებრივი მასალების განსაკუთრებული თვისება, ასევე, მათი ეკოლოგიური მდგრადობაა.
2. მარმარილო ხშირად ცივ გარემოსთან ასოცირდება, როგორ შეიძლება იყოს გამოყენებული ეს მასალა ისე რომ, პირიქით საცხოვრებელ სივრცეში, მყუდრო და თბილი ატმოსფერო შექმნას?
ეს, პირველ რიგში, შესაძლებელია მისი თბილ ფერებთან და ბუნებრივ ფაქტურებთან კომბინაციაში გამოყენების საფუძველზე. მარმარილოს ცივი ვიზუალის განეიტრალების ერთ-ერთი ყველაზე გავრცელებული ხერხი მასთან ერთად ხის ფაქტურების გამოყენებაა. ნაკლები ინტენსივობით, თუმცა მსგავსი ეფექტი აქვს ნეოკლასიკურ სტილში გავრცელებულ ტენდენციას, რომელიც მარმარილოს ზედაპირებთან ოქროსფერი მეტალის გამოყენებას გულისხმობს, მაგალითად სანათის, ავეჯის შტრიხების საშუალებით. გარდა ამისა, მარმარილოს ვიზუალური ეფექტის “გათბობა„ სხვა საშუალებებითაც არის შესაძლებელი. მარმარილო ინტერიერში ხშირ შემთხვევაში დომინანტურ შტრიხს წარმოადგენს მისი დახვეწილი, განსაკუთრებული ვიზუალის ხარჯზე. მარმარილოს მკვეთრი ტონების გამო, მისი გამოყენება საბაზისო მასალადაც არის შესაძლებელი, რომლის საფუძველზეც, აქცენტებს ინტერიერში სხვა ელემენტები ქმნიან, ასეთი სახით მარმარილოს გამოყენება შესაძლებელია თანამედროვე, ან ნებისმიერ ისეთ სტილში, რომელშიც მკვეთრი ფერებისა და მრავალფეროვანი ფაქტურების გამოყენებაა მიღებული. ამ შემთხვევაში მარმარილოსთან კობინირებული მკვეთრი ფერის ავეჯი, ფილები, ან თანამედროვე მხატვრის ნიმუშები ინტერიერს ხალისიან, პოზიტიურ განწყობას მატებს.
3. ბუნებრივი მასალების მთავარი უპირატესობა არის...
მათი გამორჩეული ვიზუალი, ფაქტურა, მდგრადობა და ეკოლოგიურობა.
4. დაგვიხასიათეთ ერთი წინადადებით ხის ფაქტურა.
რამდენიმე სიტყვით, ხეს აღვწერდი, როგორც ელეგანტურ, ინტერიერში ბუნებრივი ჰარმონიის შემომტან, ფაქტურულად მდიდარ და დიზაინის ნებისმიერ სტილში და ნებისმიერ ეპოქაში უცლელად მიღებულ მასალას.
5. თანამედროვე სამყაროში, ბუნებრივი ქცვები, ასევე ხის ფაქტურა ნელ-ნელა იცლება ხელოვნური, მაღალი ხარისხის მასალებით, რა შეგიძლიათ გვითხრათ ამის შესახებ, რა არის ფაქტორები რომლებიც მომხმარებელმა არჩევანის გაკეთებისას უნდა გაითვალისწინოს?
ამ მხრივ, ხელოვნური მასალების ორ უპირატესობას გამოვყოფდი. პირველ რიგში მიუხედავად იმისა, რომ ბუნებრივ მასალებს გარკვეული ხარისხის მდგრადობა ახასიათებს, მათ ხელოვნურ ჩამნაცვლებლებს, განსაკუთრებით ხისა და მარმარილოს შემთხვევაში, საგრძნობლად მაღალი სიცოცხლის ციკლი აქვთ და ბუნებრივ ანალოგებზე მარტივად მოსავლელია. მაგალითად ბუნებრივი მარმარილოსგან განსხვავებით, ხელოვნური ქვა მდგრადია ნაკაწრების და ლაქების მიმართ და მომხარებლისთვის მისი მოვლა და ვიზუალის უცვლელად შენარჩუნება იოლია.
ხელოვნური მასალის მეორე უპირატესობა დიზაინის კონტროლს უკავშირდება. რადგან ხელოვნური მასალების შექმანში თანამედროვე ციფრული ტექნოლოგიებია ჩართული, მათი ნებისმიერი ვიზუალითა და ფაქტურით შექმნაა შესაძლებელი. როგორც დიზაინერისთვის, ჩემთვის ბუნებრივი მასალების ხელოვნური ჩამნაცვლებლების ეს თვისება განსაკუთრებით საინტერესოა - ვიზუალისა და ფაქტურის თვალსაზრისით მოხსნილი შეზღუდვები მონოლითური, მოსაწყენი და ზოგჯერ ბანალური ვიზუალისგან თავის დაღწევის შესაძლებლობასა და დიზაინის შერჩეული მიმართულებით განხორციელების სრულ თავისუფლებას მაძლევს.
თუმცა , ხელოვნური მასალების ამ ღირსებების მიუხედავად, ვთვლი, რომ ინტერიერის დიზაინში, ბუნებრივი მასალები, ხელოვნურ ანალოგებთან ერთად, უცლელად შეინარჩუნებენ მნიშვნელობას მათი ეკოლოგიურობის, განსაკუთრებული, ბუნებრივი ვიზუალისა და ფაქტურის ხარჯზე.
ლაქშერის ბლოგის კითხვებს პასუხობდა ინტერიერის დიზაინერი ნიკა გოგოლაშვილი.